POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 03 ທັນວາ 2024

ນ້ຳຕາຜູ້ນຳ
ເວລາອອກຂ່າວ: 2024-11-11 09:03:43 | ຜູ້ຂຽນ : admin1 | ຈຳນວນຄົນເຂົ້າຊົມ: 257 | ຄວາມນິຍົມ:

ປະຕູລົດໄຂອອກ, ເຫັນເກີບ ແລະ ຂາສົ້ງ ທີ່ຄຸ້ນໆ ຕາເດ່ລົງມາ. ແມ່ນ ສະຫາຍ ເຈືອງສົມບູນຂັນ ເລຂາຂອງ ທ່ານ ໄກສອນ ພົມວິຫານ. ເພິ່ນທ້ວງວ່າ ຍັງແຂງແຮງດີນໍ ແລ້ວ ເຊີນເຮົາຂຶ້ນລົດໄປຫຼັກ 6 ດຽວນີ້ ເພື່ອລາຍງານສະພາບການດ້ານຮົບໃຫ້ກົມການເມືອງ. ເຮົາ ໄດ້ແຕ່ອວ່າຍໜ້າມາຫາພັນລະຍາ ທີ່ນ້ຳຕາຍັງບໍ່ທັນແຫ້ງ ຢືນຢູ່ໃກ້ ຫັ້ນ ແລະ ບອກວ່າ: ໃຫ້ແມ່ກັບເມືອຫາລູກເຕົ້າເຮົາຢູ່ເຮືອນກ່ອນ ແລ້ວວຽກກໍຈະກັບທັນທີໂລດ. ແລ້ວກໍຂຶ້ນລົດທາງການນຳສະ ຫາຍ ເຈືອງ ທັນທີ. ເອົາອີກແລ້ວ, ເລື່ອງຄອບຄົວຢູ່ໃນຫົວບໍ່ຮອດ 10 ນາທີ, ນັ່ງຢູ່ລົດ ຄຶດສັງລວມສະພາບການສູ້ຮົບ ສິ່ງທີ່ຈະລາຍງານອີກແລ້ວ ຮູ້ສຶກຕົວກໍແມ່ນຍາມຮອດຫຼັກ 6 ແລ້ວ. ລົງຈາກລົດ ກໍເຂົ້າຫ້ອງປະຊຸມພິເສດ ຂອງກົມການເມືອງສູນກາງພັກໂລດ, ທ່ານ ໄກສອນ, ທ່ານ ຄຳໄຕ, ທ່ານ ພູມີ, ທ່ານ ສີສົມພອນ, ທ່ານ ສີສະຫວາດ, ທ່ານ ສະໝານ ແລະ ບັນດາ ສະຫາຍ ການນຳຂັ້ນຍຸດທະສາດຈຳນວນໜຶ່ງ ນັ່ງລໍຖ້າຢູ່ຫັ້ນກ່ອນແລ້ວ. ເຮົາເຊື່ອງອາການໄດ້ດີ ມີຄວາມເຂັ້ມແຂງ, ຂໍ່ານັບພວກເພິ່ນ ຕາມກົດທະຫານຈຶກຈັກທຸກອະລິຍະບົດ. ພວກເພິ່ນກໍທະຍອຍກັນລຸກຂຶ້ນມາຈັບມືຖາມຂ່າວ, ຖາມເຖິງສຸຂະພາບ ທີ່ເຮົາຕອບວ່າ ແຂງແຮງດີ ແລະ ຄວາມຮູ້ສຶກຂອງເຮົາເວລານັ້ນ ກໍແຂງແຮງດີອີຫຼີ ຈົນລືມຮອດອາການເຈັບຫູ. ທ່ານໃດ ສະຫາຍໃດສະແດງຄວາມຊົມເຊີຍໃຫ້ກຳລັງໃຈທີ່ອົບອຸ່ນທີ່ສຸດ ແຕ່ເບິ່ງບັນຍາກາດບໍ່ສົດຊື່ນປານໃດ. ສັງເກດເຫັນມີນ້ຳຊຶມອອກ ຈາກວົງຕາ ທຸກຄູ່ ທີ່ຈ້ອງສຸມມາໃສ່ເຮົາ ເຖິງວ່າບາງຄູ່ຖືກປົກດ້ວຍແວ່ນຕາກໍຕາມ, ລວມທັງທ່ານ ໄກສອນ ທີ່ສັງເກດວ່າ ເຮົາລັ່ງເລໃນການເລືອກບ່ອນອັນຄວນທີ່ຈະນັ່ງ; ເພິ່ນບອກດ້ວຍສຽງໜັກແໜ້ນຈະແຈ້ງຄືເກົ່າ ໃຫ້ ເຮົາຍັບໄປນັ່ງຢູ່ເຊິ່ງໜ້າກັບເພິ່ນ. ຜູ້ອ່ານເບິ່ງຮູບນີ້ ຈະເຫັນວ່າ ເຮົາເກືອບວ່ານັ່ງຫົວໂຕະແທນ ບ່ອນເພິ່ນ, ແຕ່ເຮົາບໍ່ລັ່ງເລ, ສຳ ລັບເຮົາ ຄຳເວົ້າຂອງຜູ້ນຳ ເປັນຄຳສັ່ງ. ເປັນແນວໃດຍັງໄຫວຢູ່ບໍ? ເປັນບົດກ່າວເປີດກອງປະຊຸມ ຂອງ ທ່ານ ໄກສອນ. ເຮົາກໍລາຍງານ ແບບຕ້ອມຕັດໂລດ ຕາມກົດເສິກຫັ້ນລະ ວ່າ ການສູ້ຮົບກ້າວຂຶ້ນສູ່ຈຸດສູງສຸດຂອງສົງຄາມແລ້ວ ໂດຍບໍ່ຮູ້ວ່າຊົ່ວໂມງໃດ ນາ ທີໃດ ມັນຈະຈົບ ສຳຄັນແມ່ນ ໄຊ ຊະນະຈະຕົກເປັນຂອງໃຜ? ພວກເຂົາຮຸກຮານ ພວກເຮົາຕ້ານການຮຸກຮານ. ພວກເຂົາບຸກຕີເຂົ້າດິນແດນຂອງພວກເຮົາ ພວກເຮົາຈັ້ງທ່າຢູ່ຜືນດິນຂອງພວກເຮົາເອງ. ແນ່ນອນກຳລັງຄົນ ແລະ ຍຸດໂທຂອງພວກເຂົາເໜືອກວ່າ ແຕ່ກຳລັງໃຈຂອງພວກເຮົາສູງກວ່າ ເຖິງວ່າປະລິ ມານພວກເຮົາເລີ່ມມີບັນຫາ. ກ່ອນພວກ ເຂົາຈະຊະນະ ກໍຕ້ອງ ສູນເສຍໜັກໜ່ວງໄດ້ບໍ່ທໍ່ເສຍ. ສະ ຫຼຸບແລ້ວ ເດັດຂາດໄຊຊະນະເປັນ ຂອງເຮົາ. ສັງເກດເຫັນວ່າບັນ ຍາກາດໃນຫ້ອງປະຊຸມຜ່ອນຄາຍລົງສົດຊື່ນຂຶ້ນ ເຖິງແມ່ນວ່າມີບາງສະຫາຍຍັງເຊັດນ້ຳຕາ ແຕ່ກໍເປັນນ້ຳຕາແຫ່ງຄວາມເຊື່ອຫມັ້ນ ຕໍ່ຈາກນັ້ນ ເຮົາກໍສືບຕໍ່ຕອບຄຳຖາມລາຍລະອຽດປີກຍ່ອຍ. ພໍດີຮອດ 16 ໂມງແລ້ວ, ທ່ານ ໄກສອນ ບອກວ່າ: ໄດ້ແລ້ວ ສະຫາຍ ເອີຍ, ຊົມເຊີຍສະຫາຍ ແລະ ຊົມເຊີຍອ້າຍເອື້ອຍນ້ອງທະຫານພະນັກງານ ແລະ ປະຊາຊົນບັນດາເຜົ່າເຮົາເດີ. ກົມການ ເມືອງ ກຳໄດ້ໝົດແລ້ວ, ບາດນີ້ ໃຫ້ ສະຫາຍ ໄອ່ ກັບຄືນດ້ານຮົບດ່ວນ ເພາະໄຊຊະນະຍັງລໍຖ້າສະຫາຍ. ຕາມນັກບິນວ່າ ຖ້າກາຍ 18 ໂມງໄປແລ້ວ ຍົນຊິບໍ່ສາມາດໄປສົ່ງສະຫາຍຮອດປ້ອມບັນຊາແນວໜ້າໄດ້ໄດ໋. ຕ້ອງກັບດຽວນີ້ ຈັ່ງຊິທັນ. ເອົາແລ້ວບາດນີ້, ຄວາມຫວັງທີ່ຈະເມືອພົບລູກ ພົບເມຍ ຢູ່ເຮືອນ ແລະ ໄປກວດສຸຂະພາບ ຢູ່ໂຮງໝໍ ກໍໄດ້ພັງທະລາຍ. ຄຶດໄປກໍຢາກຫົວຂວັນໂຕເອງ ທີ່ໄດ້ສະແດງອອກເອງວ່າ ໂຕຍັງແຂງແຮງ. ໄດ້ແຕ່ໂທລະສັບບອກທາງຄອບຄົວວ່າ ພໍ່ບໍ່ມີເວລາເມືອຫາພວກລູກເທື່ອເດີ. ປະຕິບັດຄຳສັ່ງເດັດຂາດ ຂອງຂັ້ນເທິງ, ພໍແຕ່ຍົນ ໄປຮອດ ນາກອກ ທ້ອງຟ້າມືດຕຶບແລ້ວ ອາກາດໜັກຕຶ້ງດ້ວຍໝອກໜາຍ້ອນຄວາມເຢັນຂອງຄ່ຳຄືນ. ຫາທາງບິນລອດໄປປ້ອມແນວໜ້າແນວໃດກໍບໍ່ໄດ້, ຈຳເປັນຕ້ອງ ລົງປ້ອມບັນຊາແນວຫຼັງບ້ານບໍ່ສານ. ແຕ່ນັ້ນໄປ ແມ່ນໄດ້ຍ່າງຂຶ້ນພູທີ່ແສນສູງຊັນ ປະມານ 15 ຫຼັກ, ເມື່ອຍແລ້ວກໍພັກ, ມີແຮງກໍຍ່າງຕໍ່. ໃນທີ່ສຸດກໍຮອດຈອມພູ ເຊິ່ງເປັນປ້ອມບັນຊາແນວໜ້າ ພໍດີເຫັນແສງທອງແສງຄຳຢູ່ຂອບຟ້າທິດບູລະພາຍາມເຊົ້າເດິກ, ເຮົາເລີຍໂຕນລົງຂຸມຄອງເພື່ອພັກຜ່ອນ, ແລ້ວຫຼັບຈົມປິ້ງປານມຸດນ້ຳ. ຕື່ນມືນຕາມາກໍພໍດີ 9 ໂມງ; ອ້າຍນ້ອງໄດ້ມາລາຍງານສະພາບການສະໜາມຮົບ; ລາຍງານບໍ່ທັນສຸດຊ້ຳ, ສະໜາມຈັ້ງທ່າ ຖືກຝູງຍົນໂຈນອາກາດ ແລະ ປືນໃຫຍ່ 105 ມມ, 155 ມມ, ລູກຈະຫຼວດໜ້າດິນຖະຫຼົ່ມໃສ່ຢ່າງດຸເດືອດ, ຮ້າຍແຮງ ແລະ ແກ່ຍາວກວ່າທຸກໆ ຄັ້ງໃນໄລຍະຜ່ານມາ. ກົມການເມືອງ ໄດ້ຕິດຕາມຂ່າວທີ່ເຮົາກັບຂຶ້ນປ້ອມຄືນ ຢ່າງໃກ້ຊິດ, ຮູ້ເຫດການຄືດັ່ງກ່າວ ກໍມີຄວາມເປັນຫ່ວງບໍ່ໜ້ອຍ. ດັ່ງນັ້ນ ທ່ານ ຄຳໄຕ ຈິ່ງໄດ້ແຕ່ງຕັ້ງໃຫ້ສະຫາຍ ຈູມມາລີ ໄຊຍະສອນ ຫົວໜ້າກົມໃຫຍ່ເສນາທິການກອງທັບ ເດີນທາງໄປພົບເຮົາຢູ່ດ້ານຮົບ ພ້ອມກັນສັງເກດຕີລາ ຄາຢູ່ກັບທີ່ການຜັນແປຂອງສະ ພາບການ. ສະຫາຍ ຈູມ ກໍກັບຄືນມາ ລາຍງານຕໍ່ກົມການເມືອງ, ເຮົາຮູ້ຂ່າວວ່າ ທ່ານ ໄກສອນ ພົມ ວິຫານ ເຫັນດີທີ່ສຸດຕາມການຕີລາຄາສະພາບການຂອງເຮົາ. ເດືອນກໍລະກົດ ພວກເຂົາກໍຖອນທະຫານ ພາຍຫຼັງທີ່ຍິງລູກປືນຖິ້້ມທົ່ວທີບ ແລະ ຈູດເຜົາຄ້າຍ ແລະວັດຖຸສິ່ງຂອງທີ່ບໍ່ເອົາກັບເມືອໄດ້. ຮຽບຮຽງໂດຍ: ຈິດ ແລະ ສີໄພ

news to day and hot news