ວັນພະຫັດ, ວັນທີ 05 ທັນວາ 2024
ກອງປະຊຸມ ພົບປະແລກປ່ຽນສະພາບການ 2 ຝ່າຍ ລາວ-ຈີນ
ເວລາອອກຂ່າວ: 2024-11-11 13:39:28 | ຜູ້ຂຽນ : admin2 | ຈຳນວນຄົນເຂົ້າຊົມ: 696 | ຄວາມນິຍົມ: 
ກອງປະຊຸມ ພົບປະແລກປ່ຽນສະພາບການ 2 ຝ່າຍ ລາວ-ຈີນ, ຈີນ-ລາວ. ໄດ້ຈັດຂື້ນໃນ ວັນທີ 8 ພະຈິກ 2024 ນີ້, ຢູ່ທີ່ ກອງບັນຊາການທະຫານແຂວງບໍ່ແກ້ວ, ຝ່າຍລາວນຳໂດຍ ສະຫາຍ ພົນຈັດຕະວາ ບຸນມີ ພາມີໄຊ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ, ຝ່າຍຈີນນຳໂດຍ ສະຫາຍ ພັນໂທ ຢຸນສຽງຈົງ ຫົວໜ້າສູນປະສານງານລາວ-ຈີນ ປະຈຳບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ, ມີ ຄະນະຜູ້ແທນສອງຝ່າຍ, ສອງກອງບັນຊາການທະຫານ-ຕຳຫຼວດ, ຕະຫຼອດຮອດ ພະນັກງານ-ນັກຮົບ ສອງຝ່າຍ ລາວ-ຈີນ, ຈີນ-ລາວເຂົ້າຮ່ວມ.
ສະຫາຍ ພົນຈັດຕະວາ ບຸນມີ ພາມີໄຊ ໄດ້ຕ່າງໜ້າຄະນະຜູ້ແທນ ສອງກຳລັງປ້ອງກັນຊາດ-ປ້ອງກັນຄວາມສະຫງົບແຂວງບໍ່ແກ້ວ ຂຶ້ນຜ່ານບົດລາຍງານສະພາບການໂດຍຫຍໍ້ ແລະ ຍົກໃຫ້ເຫັນການຮ່ວມມືຂອງທັງຝ່າຍໃນໄລຍະຜ່ານມາເຫັນວ່າ ສອງກໍາລັງປ້ອງກັນຊາດ-ປ້ອງກັນຄວາມສະຫງົບແຂວງ ແລະ ສູນປະສານງານລາວ-ຈີນ ປະຈຳບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຈັດຕັ້ງປະຕິບັດຮ່ວມກັນເປັນຕົ້ນການແກ້ໄຂປະກົດການຫຍໍ້ທໍ້ຕ່າງໆ ທີ່ເກີດຂື້ນຕາມລໍາແມ່ນໍ້າຂອງຕອນເໜືອ ເຫັນວ່າແຕ່ລະຝ່າຍໃຫ້ຄວາມຮ່ວມມື ແລະ ພົວພັນປະສານງານກັນເປັນຢ່າງດີໃນຊ່ວງຜ່ານມາຖືເປັນບັນຫາສໍາຄັນໃນການປາບປາມ, ແກ້ໄຂສະພາບການທັນກັບເວລາ, ມີການແລກປ່ຽນຂໍ້ມູນຂ່າວສານເພື່ອຕິດຕາມ ກວດກາ, ສ່ອງແສງລາຍງານໃຫ້ແຕ່ລະຝ່າຍຮັບຮູ້ ແລະ ມີແຜນການຮ່ວມມືຊ່ວຍເຫຼືອກັນຕ້ານ ແລະ ສະກັດກັ້ນບັນຫາຕ່າງໆ ທີ່ເກີດຂື້ນໄດ້ດີ. ໂດຍສະເພາະແມ່ນການເຄື່ອນໄຫວລາດຕະເວນຕາມຂອບເຂດຄວາມຮັບຜິດຊອບຂອງຕົນ ສາມາດຈັບກຸ່ມຜູ້ກະທໍາຜິດຂົນສົ່ງສິ່ງຜິດກົດໝາຍເກີດຂຶ້ນໄດ້ທັງໝົດ 02 ຄັ້ງ, ຍືດປະເພດ ຢາບ້າໄດ້ຈໍານວນ 11 ເປົ່າ, ມີນໍ້າໜັກ 254 ກິໂລກຣາມ. ພ້ອມທັງເຮັດໃຫ້ສະພາບລຽບຕາມແມ່ນໍ້າຂອງຕອນເໜຶອ ມີຄວາມສະຫງົບ ເພື່ອອໍານວຍຄວາມສະດວກໃຫ້ການເດີນເຮືອຂົ່ນສົ່ງສິນຄ້າໃຫ້ມີຄວາມສະຫງົບປອດໄພ, ນອກຈາກນີ້ຍັງໄດ້ຮ່ວມກັນຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ເຊັ່ນ: ອາດຊະຍາກໍາຂ້າມຊາດ, ຄ້າຂາຍອາວຸດເສີກ, ການຄ້າມະນຸດ, ຄົນເຂົ້າເມືອງຜິດກົດໝາຍ ແລະ ການຄ້າຂາຍຢາເສບຕິດ ຕາມບໍລິເວນຊາຍແດນ ລຽບຕາມແມ່ນໍ້າຂອງຕອນເຫນືອ, ເພື່ອສ້າງຄວາມຢູ່ ເຢັນເປັນສຸກໃຫ້ແກ່ປະຊາຊົນທັງສອງຟາກ, ສ້າງແມ່ນໍ້າຂອງໃຫ້ກາຍເປັນແມ່ນໍ້າແຫ່ງສັນຕິພາບ ແລະ ການພັດທະນາຮອບດ້ານ.
ໃນໂອກາດນີ້ຄະນະຜູ້ແທນກອງປະຊຸມທັງສອງຝ່າຍກໍໄດ້ ສະແດງຄວາມຂອບໃຈເຊິ່ງກັນ ແລະ ກັນ. ທີ່ໄດ້ໃຫ້ການຮ່ວມມືທັງສອງຝ່າຍມີຄວາມເປັນເອກະພາບໃນຫຼາຍບັນຫາທີ່ສຳຄັນ, ອັນເປັນການປະກອບສ່ວນສຳຄັນເຂົ້າໃນການແກ້ໄຂບັນຫາຕາມຊາຍແດນ ລາວ-ຈີນ, ຈີນ-ລາວ ໃຫ້ມີຄວາມສະຫງົບດີຂຶ້ນເປັນກ້າວໆ, ມີຄວາມສອດຄ່ອງກ້າວໄປສູ່ການຮ່ວມມື 2 ຊາດ ໃຫ້ມີຄວາມສະຫງົບໂດຍພື້ນຖານ.
ໂດຍ: ວໍລະສິດ ພິດສະຫາຍ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
