ວັນສຸກ, ວັນທີ 06 ທັນວາ 2024
ກອງພັນທີ 2 ຜ່າວົງປິດລ້ອມຂອງສັດຕູ ກັບຄືນສູ່ເຂດທີ່ໝັ້ນຢ່າງປອດໄພ
ເວລາອອກຂ່າວ: 2024-05-16 10:18:23 | ຜູ້ຂຽນ : admin1 | ຈຳນວນຄົນເຂົ້າຊົມ: 2092 | ຄວາມນິຍົມ: 
ດ້ວຍເຈດຈຳນົງຈະດັບສູນກຳລັງປະຕິວັດລາວ, ພາຍຫຼັງບໍ່ໄດ້ຮັບຜົນຈາກການຕົວະຍົວະຊື້ຈ້າງຈອບອອຍຫຼາຍຄັ້ງ, ຕົ້ນເດືອນພຶດສະພາ 1959 ສັດຕູນຳໃຊ້ກຳລັງຫຼາຍກອງພັນດຳເນີນການປິດລ້ອມ ສອງກົມກອງ ກຳລັງປະກອບອາວຸດຂອງຝ່າຍປະເທດລາວຢ່າງແໜ້ນໜາ ທວງໃຫ້ກອງພັນທີ 1 (ຕັ້ງຢູ່ຊຽງເງິນ) ແລະ ກອງພັນທີ 2 (ຕັ້ງຢູ່ທົ່ງໄຫຫີນ) ປົດອາວຸດ. ຈາກນັ້ນ, ວັນທີ 18 ພຶດສະພາ 1959 ຜູ້ບັນຊາການສູງສຸດທະຫານຫຸ່ນວຽງຈັນ ໄດ້ຍື່ນຄຳຂາດໃຫ້ສອງກົມກອງດັ່ງກ່າວ ຕ້ອງຍອມຈຳນົນພາຍໃນເວລາ 24 ຊົ່ວໂມງ. ໃນສະພາບອັດຕະຄັດ ແລະ ເຄັ່ງຮ້ອນ, ໂດຍບໍລິສຸດຕໍ່ ພັກ ຕໍ່ປະຊາຊົນ ພະນັກງານ-ນັກຮົບກອງພັນທີ 2 ໄດ້ມີແຜນ ການ, ນຳໃຊ້ໄຫວພິບ ແລະ ຄວາມ ອົງອາດກ້າຫານຜ່າວົງປິດລ້ອມຂອງສັດຕູ ກັບຄືນສູ່ເຂດທີ່ໝັ້ນ ໄດ້ຢ່າງປອດໄພ.
ເວລາ 19:30 ໂມງ ຂອງວັນທີ 18 ພຶດສະພາ 1959 ຄະນະພັກ-ຄະນະບັນຊາກອງພັນທີ 2 ໄດ້ຮຽກເຕົ້າໂຮມພະນັກງານ, ສະມາຊິກພັກ-ນັກຮົບ ທັງໝົດໃນກອງພັນ ເພື່ອປະກາດລຶບຊື່ຮູບການຈັດຕັ້ງຂອງກອງທັບລາຊະອານາຈັກ ແລະ ສ້າງຕັ້ງຄະນະບັນຊາໃໝ່ຂຶ້ນແທນ ໂດຍແຕ່ງ ຕັ້ງ ສະຫາຍ ຈຳນຽນ ບຸນລອດ ເປັນ ຫົວໜ້າກອງພັນ, ສະຫາຍ ທອງສະຫວັດ ໄຂຄຳພິທູນ ເປັນກຳມະການ-ການເມືອງ, ສະຫາຍ ສວຍ ບຸນຈະເລີນ ເປັນຮອງຫົວ ໜ້າກອງພັນ ແລະ ສະຫາຍ ຫຼວຍແສນຄຳ ກົມມະດຳ ເປັນຮອງກຳ ມະການ-ການເມືອງ ພ້ອມທັງ ອອກຄຳສັ່ງໃຫ້ບັນດາກອງຮ້ອຍ ເລີ່ມຕົ້ນປະຕິບັດແຜນການຖອນກຳລັງ ແລະ ຜັນຂະຫຍາຍຄຳສັ່ງຖອນກຳລັງຄັ້ງນີ້ໃຫ້ທົ່ວທຸກກອງຮ້ອຍຢ່າງວ່ອງໄວ ແລະ ປິດລັບທີ່ສຸດ. ຈາກນັ້ນ, ພາຍໃຕ້ການບັນຊາຂອງຄະນະພັກກອງພັນ, ແຕ່ລະກົມກອງ ພ້ອມກັບຄອບຄົວພະນັກງານ, ນັກຮົບທັງໝົດໄດ້ນຳໃຊ້ຄວາມມືດປິດ
ລັບຖອນກຳລັງໄປທາງທິດບ້ານໂຕນ-ມາແຖງ-ໜອງເຕີ້, ເຂົ້າ ປ່າໄປຕາມທິດບ້ານມາຍ (ທິດ ຕາເວັນຕົກສ່ຽງໃຕ້ ປະມານ 15 ກິໂລແມັດ). ໃນເວລາທີ່ກຳລັງສ່ວນຫຼາຍພວມຖອນທັບອອກໄປນັ້ນ ເພື່ອຫຼອກສັດຕູ, ກອງພັນໄດ້ຈັດຕັ້ງກຳລັງ 1 ໝວດ ປະຈຳຢູ່ຄ້າຍ ໂດຍແມ່ນ ສະຫາຍ ອາວ ເປັນຜູ້ຮັບຜິດຊອບ ເຮັດໜ້າທີ່ຕີກະແລ່ງ, ລວມແຖວ ເອີ້ນຊື່, ກວດກາຈຳນວນພົນຕາມປົກ ກະຕິທີ່ເຄີຍໄດ້ປະຕິບັດຜ່ານມາ. ພາກສ່ວນນີ້, ໄດ້ປະຈຳຢູ່ຄ້າຍຈົນຮອດເວລາທ່ຽງຄືນ ຈິ່ງມິດ
ງຽບຖອນອອກໄປຕາມທິດເຄື່ອນທັບຂອງກອງພັນ. ພ້ອມກັບພາກສ່ວນປະຈຳຢູ່ຄ້າຍ, ກອງ ພັນໄດ້ຈັດຕັ້ງກຳລັງປະມານ 1 ກອງຮ້ອຍ ໂດຍແມ່ນ ສະຫາຍ ເຢຍນູ ຮັບຜິດຊອບ ປິດລັບສະກັດສາຍທາງຢູ່ຂົວຊຽງຂວາງ ໃຫ້ລໍຖ້າຮອດເວລາ 6:00 ໂມງ ຂອງມື້ຕໍ່ມາ ຖ້າວ່າ ພວກສັດຕູໄລ່ຕາມມາຮອດຂົວ ແມ່ນໃຫ້ໃຊ້ລະເບີດທຳລາຍຂົວ ພ້ອມທັງ ດັບສູນພວກເຂົາ ແລະ ໜ່ວຍຫວ່ານຂ່າວ ວ່ອງໄວປ່ອຍຂ່າວຫຼອກສັດຕູວ່າຈະບຸກຕີເຂົ້າບໍລິເວນ ໂພນສະຫວັນ ເພື່ອປົດປ່ອຍເອົານັກໂທດທີ່ຖືກກັກຂັງຢູ່ໃນຄຸກ.
ຍ້ອນມີການຈັດຕັ້ງເຄື່ອນທັບ ແລະ ມີກຳລັງຫຼອກສັດຕູ ສະນັ້ນ, ການຖອນທັບຂອງກອງພັນທີ 2 ອອກຈາກຄ້າຍ ຈຶ່ງຮັກສາຄວາມລັບ ແລະ ປອດໄພດີ. ຮອດເວລາ 7:00 ໂມງ ຂອງວັນທີ 19 ພຶດສະພາ 1959 ເມື່ອສັດຕູບຸກເຂົ້າຫວັງຈະປົດອາວຸດຂອງກອງພັນທີ 2 ຕາມເຈດຈຳນົງຂອງພວກເຂົາ ແຕ່ໃນທີ່ສຸດຕ້ອງຕົກສະເງີ້ ບໍ່ນຶກບໍ່ຝັນ ຢູ່ໃນຄ້າຍຍັງເຫຼືອພຽງຄວາມມິດງຽບ, ຄວາມວ່າງເປົ່າ ບໍ່ມີຮອດເງົາຂອງພະນັກງານ-ນັກຮົບກອງພັນທີ 2. ພວກສັດຕູເຈັບແຄ້ນແໜ້ນໃຈ, ພັນຕີ ຄຳສຸກ ອິນສີຊຽງໃໝ່ ຜູ້ບັນຊາການທະຫານເຂດຍ່ອຍຊຽງຂວາງ ຮີບຮ້ອນລະດົມກຳລັງ 6 ກອງພັນທະຫານພາກ 2 ຂອງພວກເຂົາ ເພື່ອໄລ່ຕາມ ດັບສູນກຳລັງກອງພັນທີ 2. ນອກນັ້ນ, ຍັງມີເຮືອບິນຊ່ວຍໜູນອ້ອມຂ້າງທົ່ງໄຫຫີນ ແລະ ຕາມເສັ້ນທາງທີ່ພວກເຂົາ ຄິດວ່າກຳລັງຂອງກອງພັນທີ 2 ຈະຜ່ານໄປ.
ສ່ວນກຳລັງກອງພັນທີ 2 ພາຍຫຼັງອອກຈາກທົ່ງໄຫຫີນ ໄດ້ເຄື່ອນທັບໄປຕາມທົ່ງຫຍ້າ, ປ່າຄັງຕຶບໜາເພື່ອໃຫ້ຫວິດຈາກວົງປິດລ້ອມຂອງພວກສັດຕູ, ກອງຮ້ອຍທີ 3 ເປັນກອງຮ້ອຍເຂັ້ມແຂງອາດຫານ ທີ່ນຳໜ້າເດີນທາງໄປກ່ອນ ໄດ້ນຳໃຊ້ງ້າວດັບສູນກຳລັງສັດຕູຢ່າງປິດລັບ, ທັງຕີທັງຂົນຂວາຍສັດຕູ ເພື່ອປົກປັກຮັກສາກຳລັງ ແລະ ປິດລັບ ເຮັດໃຫ້ກອງພັນສືບຕໍ່ການເຄື່ອນທັບຢ່າງປອດໄພ. ວັນທີ 21 ພຶດສະພາ 1959 ກຳລັງກອງພັນທີ 2 ໄດ້ເຄື່ອນທັບໄປຮອດເຂດຊຽງຄົງ ເຊິ່ງແມ່ນເຂດຮາກຖານການປະຕິວັດເກົ່າແຫ່ງໜຶ່ງ ຢູ່ຫ່າງຈາກທົ່ງໄຫຫີນ-ຊຽງຂວາງ ໄປທາງທິດຕາ ເວັນອອກສ່ຽງໃຕ້ປະມານ 40 ກິໂລແມັດ. ຢູ່ທີ່ນັ້ນ, ກອງພັນໄດ້ຕິດຕໍ່ພົວພັນກັບ ສະຫາຍ ຄຳພາ ຜູ້ຮັບຜິດຊອບພື້ນຖານ ເພື່ອອຳ ນວຍຄວາມສະດວກໃນການພັກຜ່ອນນອນຄ້າງຄືນ ແລະ ປຸກ ລະດົມປະຊາຊົນໃຫ້ການສະໜັບສະໜູນ ນຳເອົາສະບຽງອາຫານຊ່ວຍເຫຼືອ ກອງພັນທີ2, ເມື່ອໄດ້ຮັບການຊ່ວຍເຫຼືອຈາກປະ ຊາຊົນ ບ້ານຊຽງຄົງຢ່າງຈິງໃຈ, ພະນັກງານ-ນັກຮົບ ຍິ່ງມີກຳລັງໃຈເຄື່ອນທັບຕໍ່ໄປ. ຕອນເຊົ້າ ຂອງວັນທີ 22 ພຶດສະພາ ກອງພັນທີ 2 ໄດ້ສືບຕໍ່ເຄື່ອນທັບລັດປ່າໄປທາງທິດຕາເວັນອອກ ພໍຮອດຕີນພູຊາວ ໄດ້ພົບທະຫານມັກກີ ຂອງນາຍກອງ ເຢຍຈື ທະຫານໝວດນີ້ ໄດ້ຮັບຄຳສັ່ງບໍ່ໃຫ້ແຕກສຽງປືນ ແລະ ຕ້ອງຊ່ວຍເຫຼືອກອງພັນທີ 2 ຢ່າງສຸດຂີດ (ກ່ອນນີ້ ສະຫາຍ ຕູ້ ໄດ້ສຶກສາອົບຮົມ, ລະດົມໃຫ້ນຳພາທາງກອງພັນທີ 2 ໄປຫາເຂດເຄື່ອນໄຫວທີ່ມີຄວາມປອດໄພ). ຜ່ານພູຊາວ ແມ່ນຍ່ານທາງທີ່ຫຍຸ້ງຍາກທຸລະກັນດານ, ປ່າຕຶບດົງໜາ, ພູສູງສະຫຼັບຊັບຊ້ອນກັນ ເຖິງວ່າ ອົດທົນພະຍາຍາມເຄື່ອນທັບລຽນຕິດ ແຕ່ຍ້ອນຂະບວນມີທັງຄອບຄົວແມ່ຍິງ, ເດັກນ້ອຍໄປນຳ ຈຶ່ງເຮັດໃຫ້ການເດີນທາງຜ່ານເຂດທຸລະກັນດານນີ້ ຊັກຊ້າ, ຈົນຮອດວັນທີ 25 ພຶດສະພາ 1959 ກຳລັງກອງພັນທີ 2 ຈຶ່ງໄປຮອດເຂດເມືອງງານ. ເມືອງງານ ແມ່ນພື້ນທີ່ແຫ່ງໜຶ່ງ ຢູ່ໃກ້ກັບຊາຍແດນ ລາວ-ຫວຽດນາມ ມີເສັ້ນທາງລຳລຽງສະດວກ, ສັດຕູໄດ້ເອົາໃຈໃສ່ເປັນພິເສດ. ວັນທີ 26 ພຶດສະພາ 1959 ສັດຕູໄດ້ຮູ້ວ່າ ກຳລັງກອງພັນທີ 2 ເຄື່ອນທັບໄປຮອດເມືອງງານ ພວກເຂົາໄດ້ອອກຄຳສັ່ງໃຫ້ບັນດາກອງພັນທີ່ໄລ່ຕາມເພີ່ມທະວີຄວາມໄວ ນຳກຳລັງໄປສະກັດກັ້ນ ເພື່ອບໍ່ໃຫ້ກອງພັນທີ 2 ອອກຈາກຊາຍແດນໄປໄດ້.
ໂດຍກຳແໜ້ນລ່ຽມລາຍຂອງສັດຕູ, ຄະນະພັກ-ຄະນະບັນຊາກອງພັນທີ 2 ໄດ້ສັງເກດ ແລະ ຕີລາ ຄາສະພາບການໃນການເຄື່ອນທັບທີ່ເຕັມໄປດ້ວຍການສ່ຽງໄພຄັ້ງນີ້ ວ່າ: ຂົງເຂດທີ່ກອງພັນທີ 2 ເຄື່ອນທັບໄປນັ້ນ ລ້ວນແຕ່ມີຮາກຖານປະຊາຊົນທີ່ເຂັ້ມແຂງ, ຈິດໃຈຂອງສັດຕູທີ່ໄລ່ຕາມ ກໍອ່ອນເພຍ, ສ່ວນຫຼາຍ ແມ່ນພວກເຂົາບໍ່ຢາກຕີກັບກຳລັງກອງພັນທີ 2.
ວັນທີ 27 ພຶດສະພາ 1959 ກອງຮ້ອຍທີ 4 ເຊິ່ງເປັນກອງ ຮ້ອຍເຂັ້ມແຂງ ຂອງກອງພັນທີ 2 ແລະ 1 ໝວດສຳນັກກອງປັດໄຈ ໄດ້ສົມທົບເຕົ້າໂຮມກຳລັງໄຟ ປືນຄົກ 81 ມມ, ເດກາ 57 ມມ, ເດັດດ່ຽວສະກັດຕີສັດຕູ 2 ກອງຮ້ອຍ ກອງພັນໂດດຈ້ອງ ຂອງສັດຕູທີ່ດື້ດ້ານໄລ່ຕາມມາ, ພວກເຮົາເດັດດ່ຽວບຸກຕີດັບສູນກຳລັງສັດຕູຢ່າງອາດຫານ, ການສູ້ຮົບດຳເນີນໄປຢ່າງດຸເດືອດ ພວກເຮົາສາມາດເປັນເຈົ້າການ ເຮັດໃຫ້ທະຫານສັດຕູ ແຕກທະລາຍ ເສຍຫາຍ 1 ໝວດ, ທັບມ້າງການບຸກໂຈມຕີຂອງກອງຮ້ອຍອື່ນໆ ໃຫ້ຖອຍໄປ, ປ້ອງກັນຮູບແຖວເຄື່ອນທັບຂອງກອງພັນທີ 2 ໄດ້ຢ່າງປອດໄພ.
ຫຼັງຈາກຕີຕ້ານສັດຕູຄັ້ງນີ້, ກຳລັງທັງໝົດຂອງກອງພັນທີ 2 ທັງເຄື່ອນທັບ, ທັງສືບຕໍ່ຕີສັດຕູ ເພື່ອປ້ອງກັນຮູບແຖວເຄື່ອນໄຫວ. ເວລານີ້ ທະຫານເຂດ 4 ຂອງເພື່ອນບ້ານຫວຽດນາມ,ໄດ້ແຕ່ງຕັ້ງພະນັກ ງານ 35 ສະຫາຍ ແລະ ປະຊາຊົນ 1 ບ້ານ ຢູ່ຕິດກັບຊາຍແດນ ໄປຕ້ອນຮັບກຳລັງກອງພັນທີ 2 ທີ່ເຄື່ອນທັບມາໃກ້ຊາຍແດນ ຫວຽດນາມ ແລະ ໄດ້ພົວພັນກັນຢ່າງສະໜິດສະໜົມ ທັງໃຫ້ການນຳພາທາງ, ຮອດວັນທີ 2 ມິຖຸນາ 1959 ກຳລັງກອງພັນທີ 2 ໄດ້ເຄື່ອນທັບໄປຮອດເຂດທີ່ໝັ້ນຢ່າງປອດໄພ.
ຜ່ານການເຄື່ອນທັບຕະຫຼອດ 10 ກວ່າວັນຄືນໄດ້ລັດປ່າຜ່າດົງ, ທັງເຄື່ອນທັບ, ທັງສູ້ຮົບ, ກອງ ພັນທີ 2 ພ້ອມກັບ 91 ຄອບຄົວ ໄດ້ຜ່າວົງປິດລ້ອມຢ່າງໜາ ແໜ້ນຂອງສັດຕູ ໄປສູ່ເຂດທີ່ໝັ້ນດ້ວຍຄວາມປອດໄພ, ບົນ ເສັ້ນທາງເຄື່ອນທັບທີ່ແສນຫຍຸ້ງ ຍາກລຳບາກ ເພື່ອປ້ອງກັນຕົວ ເອງ, ກອງພັນທີ 2 ໄດ້ສູ້ຮົບ
ທັງນ້ອຍ ແລະ ໃຫຍ່ 10 ຄັ້ງ, ຍຶດປືນໄດ້ 3 ກະບອກ ແລະພາ ຫະນະສົງຄາມຈຳນວນໜຶ່ງ, ການຜ່າວົງປິດລ້ອມຂອງກອງພັນທີ 2 ໃນທີ່ສຸດກໍສາມາດຍາດ ໄດ້ໄຊຊະນະຢ່າງສະຫງ່າງາມ.
ຮຽບຮຽງໂດຍ: ບຸນທະວີ ອິນທະມິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
