POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 07 ທັນວາ 2024

ວັນປະກາດເອກະລາດ 12 ຕຸລາ 1945 ເປັນວັນປະຫວັດສາດສຳຄັນຂອງຊາດ
ເວລາອອກຂ່າວ: 2024-10-11 12:05:37 | ຜູ້ຂຽນ : admin3 | ຈຳນວນຄົນເຂົ້າຊົມ: 910 | ຄວາມນິຍົມ:

ກ່ອນໜ້ານີ້ຄື ວັນທີ 12 ຕຸ ລາ 1945 ໄດ້ມີການໂຮມຊຸມນຸມໃຫຍ່ຢູ່ວຽງຈັນ ເພື່ອປະກາດຄວາມເປັນເອກະລາດຂອງຊາດລາວເປັນຄັ້ງທຳອິດ ຈາກແອກປົກຄອງຂອງພວກລ່າເມືອງຂຶ້ນ ແລະ ພວກຮຸກຮານຕ່າງຊາດ ວັນດັ່ງກ່າວນັ້ນ ໄດ້ເປັນຂີດໝາຍແຫ່ງໄຊຊະນະຂອງການຕໍ່ສູ້ອັນພິລະອາດຫານ, ດ້ວຍຄວາມສາມັກຄີ ແລະ ການເສຍສະຫຼະອັນໃຫຍ່ຫຼວງຂອງກອງທັບ ແລະ ປະຊາຊົນ ພາຍໃຕ້ການນຳ ພາຂອງພັກປະຊາຊົນປະຕິວັດລາວ. ໃນທ້າຍສະຕະວັດທີ 19, ພວກລ່າເມືອງຂຶ້ນຝຣັ່ງໄດ້ເຂົ້າມາຮຸກຮານ ແລະ ຍຶດຄອງເອົາປະເທດເຮົາເປັນຫົວເມືອງຂຶ້ນ ປະເທດລາວໄດ້ສູນເສຍເອກະລາດ ປະ ຊາຊົນລາວຂາດອິດສະຫຼະພາບກາຍເປັນຂ້ອຍຂ້າຂອງຕ່າງຊາດ ດ້ວຍມູນເຊື້ອບໍ່ຍອມຈຳນົນ ປະຊາຊົນລາວບັນດາເຜົ່າໄດ້ລຸກຮືຂຶ້ນຕໍ່ສູ້ຕ້ານພວກລ່າເມືອງຂຶ້ນຝຣັ່ງຢ່າງເນື່ອງນິດລຽນຕິດ, ຕັ້ງແຕ່ມື້ທຳອິດທີ່ພວກເຂົາໄດ້ເຂົ້າມາຮອດປະເທດລາວ; ພວກລ່າເມືອງຂຶ້ນຍິ່ງເພີ່ມທະວີການຍຶດຄອງ ແລະ ກົດຂີ່ຂູດຮີດ ຫຼາຍຂຶ້ນທໍ່ໃດ, ການຕໍ່ສູ້ຂອງປະຊາຊົນບັນດາເຜົ່າກໍຍິ່ງເປີດກວ້າງອອກໄປທົ່ວທຸກແຫ່ງຫົນໃນຂອບເຂດທົ່ວປະເທດ. ເຖິງວ່າການຕໍ່ສູ້ໃນໄລຍະນັ້ນບໍ່ໄດ້ມີພັກນຳພາຂາດອາວຸດຍຸດໂທປະກອນອັນຈຳເປັນ ແລະ ໄດ້ຖືກປາບປາມຢ່າງຮ້າຍແຮງປ່າເຖື່ອນກໍຕາມ, ແຕ່ກໍໄດ້ເຮັດໃຫ້ພວກລ່າເມືອງຂຶ້ນຕ້ອງສະທ້ານຢ້ານກົວ ແລະ ຖືກສູນເສຍເປັນຈຳນວນບໍ່ໜ້ອຍ ອັນສຳຄັນທີ່ສຸດແມ່ນໄດ້ສະແດງໃຫ້ພວກເຂົາເຫັນວ່າຄົນລາວມີນ້ຳໃຈຮັກຊາດອັນສູງສົ່ງ ແລະ ຍອມຕາຍດີ ກວ່າເປັນຂ້ອຍຂ້າຂອງຊາດອື່ນ. ພາຍຫຼັງມະຫາປະຕິວັດເດືອນ ຕຸລາ 1917 ໄດ້ຮັບໄຊຊະນະ ແລະ ສະຫະພາບໂຊວຽດໄດ້ເກີດເປັນລັດສັງຄົມນິຍົມ ລັດທຳອິດໃນໂລກ ແລະ ພາຍຫຼັງທີ່ປະທານ ໂຮ່ຈີມິນ ໄດ້ຄົ້ນພົບສັດຈະທຳທີ່ວ່າ “ຢາກກູ້ຊາດ ແລະ ປົດປ່ອຍຊາດ ບໍ່ມີເສັ້ນທາງອື່ນໃດ ນອກຈາກເສັ້ນທາງຂອງການປະຕິວັດກຳມະຊີບ” ຂະບວນການປະຕິວັດຂອງອິນດູຈີນຕິດ ພັນກັບຂະບວນການປະຕິວັດໂລກ ແລະ ເຕີບໃຫຍ່ຂຶ້ນຢ່າງວ່ອງໄວ. ປີ 1930 ພັກກອມມູນິດອິນ ດູຈີນໄດ້ກຳເນີດເກີດຂຶ້ນ ເຮັດໃຫ້ການຕໍ່ສູ້ຂອງປະຊາຊົນບັນ ດາປະເທດໃນອິນດູຈີນມີແນວ ທາງ ແລະ ມີຍຸດທະສາດອັນຈະ ແຈ້ງ; ການຕໍ່ສູ້ຂອງປະຊາຊົນລາວບັນດາເຜົ່າໄດ້ກ້າວເຂົ້າສູ່ໄລຍະໃໝ່, ດ້ວຍຄຸນນະພາບອັນໃໝ່ ພາຍໃຕ້ການນຳພາຊີ້ນຳຂອງອົງຄະນະພັກແຄວ້ນລາວ ບັນດານັກຮົບກອມມູນິດຮຸ່ນທຳອິດຂອງລາວໄດ້ເອົາຕົວເຈືອຈານເຂົ້າກັບປະຊາຊົນບັນດາເຜົ່າຢູ່ຮາກຖານ ແລະ ໄດ້ດຳເນີນການໂຄສະນາຂົນຂວາຍ ແລະ ຈັດຕັ້ງຮາກຖານປະຕິວັດຂຶ້ນແບບປິດລັບ ຢູ່ຫຼາຍບ່ອນ ເປັນຕົ້ນຢູ່ບໍ່ແຮ່, ໂຮງຈັກ, ໂຮງງານ, ໃນໂຮງຮຽນ, ໃນຕົວເມືອງ, ໃນຊົນນະບົດ, ຄ້າຍທະຫານ; ໄດ້ເຕົ້າໂຮມ ແລະ ຈັດຕັ້ງນຳພາປະ ຊາຊົນ, ບັນດາຊັ້ນຄົນລຸກຂຶ້ນຕໍ່ສູ້ຕ້ານພວກລ່າເມືອງຂຶ້ນຝຣັ່ງຢ່າງພິລະອາດຫານ, ເນື່ອງນິດລຽນຕິດ ແລະ ນັບມື້ນັບເຕີບໃຫຍ່ຂະຫຍາຍຕົວກວ້າງອອກໄປໃນທົ່ວປະເທດ ໃນຂະນະດຽວກັນນັ້ນການຈັດຕັ້ງນຳພາ-ຊີ້ນຳ ກໍມີລັກສະນະລວມສູນເປັນເອກະພາບມີຍຸດທະວີທີທີ່ຄ່ອງແຄ້ວມີຍຸດທະສາດອັນຈະແຈ້ງ ແລະ ມີ ແກນນຳທີ່ສະຫຼຽວສະຫຼາດເຂັ້ມ ແຂງ. ເມື່ອກາລະໂອກາດໄດ້ມາເຖິງ ເປັນຕົ້ນແມ່ນໃນປີ 1945 ທີ່ກອງທັບແດງໂຊວຽດໄດ້ຊະ ນະພວກຟາຊິດເຢຍລະມັນໃນສົງຄາມໂລກ ຄັ້ງທີ 2, ສ່ວນຢູ່ຫວຽດນາມ ການປະຕິວັດເດືອນສິງຫາໄດ້ຮັບໄຊຊະນະ ແລະ ສ້າງຕັ້ງສາທາລະນະລັດ ປະຊາທິປະໄຕ ຫວຽດນາມ ຂຶ້ນໃນວັນທີ 2 ກັນຍາ 1945; ພັກໄດ້ເດັດດ່ຽວນຳພາປະຊາຊົນເຮົາລຸກຂຶ້ນຍຶດອຳນາດການປົກ ຄອງໃນທົ່ວປະເທດຈາກກຳມືຂອງພວກຂຸນເສີກຍີ່ປຸ່ນ ແລະ ພວກລ່າເມືອງຂຶ້ນຝຣັ່ງ ຂະບວນການຍຶດອຳນາດຢູ່ວຽງຈັນ ໄດ້ເລີ່ມຈາກຂະບວນການຕໍ່ສູ້ຂອງກຳມະກອນ ແລະ ຕໍ່ມາໃນວັນທີ 23 ສິງຫາ 1945 ຈິ່ງມີການໂຮມຊຸມນຸມໃຫຍ່ທີ່ມີຄົນເຂົ້າຮ່ວມໝື່ນກວ່າຄົນ ໂດຍມີຕົວແທນຂອງກຳລັງປະຕິວັດເປັນແກ່ນສານນຳພາ ແລະ ປຸກລະດົມມວນຊົນສາມັກຄີກັນ ເດັດດ່ຽວຕໍ່ສູ້ກູ້ເອົາເອກະລາດ ແລະ ອິດສະຫຼະພາບອັນແທ້ຈິງມາໃຫ້ປະເທດຊາດ. ຈາກເຫດການດັ່ງກ່າວນັ້ນ ຂະບວນການຍຶດອຳນາດໄດ້ແຜ່ລາມໄປຫຼາຍແຂວງ ເປັນຕົ້ນ: ຢູ່ສະຫວັນນະເຂດ (ໃນວັນທີ 30 ສິງຫາ), ຢູ່ທ່າແຂກ (ໃນວັນທີ 1 ກັນຍາ); ຢູ່ຊຳເໜືອ (ແຕ່ວັນທີ 26 ສິງຫາ ເຖິງຕົ້ນເດືອນຕຸລາ) ແລະ ຢູ່ແຂວງອື່ນໆ ໄດ້ສ້າງເງື່ອນ ໄຂໃຫ້ແກ່ການລຸກຮືຂຶ້ນຍຶດອຳນາດຈາກພວກລ່າເມືອງຂຶ້ນ ແລະ ປະກາດຄວາມເປັນເອກະລາດແຫ່ງຊາດ. ວັນທີ 12 ຕຸລາ 1945 ໄດ້ກາຍເປັນເຫດການທີ່ມີຄວາມໝາຍປະຫວັດສາດຂອງຊາດລາວ ຍ້ອນວ່າແມ່ນມື້ທີ່ມີການໂຮມຊຸມນຸມ, ທີ່ສະໜາມກິລາແຫ່ງຊາດ (ສະໜາມກິລາເຈົ້າອະນຸວົງໃນປັດຈຸບັນ) ເຊິ່ງມີມວນຊົນເຂົ້າຮ່ວມກວ່າ 2 ໝື່ນຄົນ. ໃນມື້ນັ້ນ, ລັດຖະບານລາວອິດສະ ຫຼະ ໄດ້ເປັນຕົວແທນໃຫ້ແກ່ວົງຄະນະຍາດແຫ່ງຊາດ ປະກາດຄວາມເປັນເອກະລາດຂອງປະເທດລາວ ຕໍ່ໂລກຢ່າງເປັນທາງການ, ປະກາດໂຮມແຜ່ນ ດິນລາວເປັນເອກະພາບ ພ້ອມກັນນັ້ນກໍໄດ້ອອກຖະແຫຼງການກ່ຽວກັບການປ່ຽນແປງການປົກຄອງ, ລົບລ້າງທຸກໆ ສັນຍາທີ່ລາວໄດ້ເຊັນກັບຝຣັ່ງເສດ, ປະກາດໃຊ້ລັດຖະທຳມະນູນສະບັບທຳອິດ, ປະກາດໃຊ້ທຸງຊາດ (ທຸງຊາດລາວປັດຈຸບັນ); ປະກາດແຕ່ງຕັ້ງຄະນະລັດຖະບານຊົ່ວຄາວ ເຊິ່ງມີສະເດັດເຈົ້າ ສຸພານຸວົງ ຕັ້ງເປັນລັດຖະມົນຕີວ່າການກະຊວງການຕ່າງປະເທດ ແລະ ຕໍ່ມາໄດ້ດຳລົງຕຳແໜ່ງເປັນຜູ້ບັນຊາ ການທະຫານສູງສຸດ ອີກດ້ວຍ. ການປະກາດເອກະລາດວັນທີ 12 ຕຸລາ 1945 ໄດ້ເຮັດໃຫ້ຊາວໂລກຮັບຮູ້ກ່ຽວກັບຄວາມເປັນຊາດລາວຂອງພວກເຮົາ, ກໍຄືຮັບຮູ້ອະທິປະໄຕຂອງຊາດລາວ ແລະ ເຂດນ້ຳແດນດິນຂອງປະເທດລາວ; ພ້ອມກັນນັ້ນກໍຮັບຮູ້ລັດຖະບານຊົ່ວຄາວຂອງລາວ ແລະ ຮັບຮູ້ວ່າຊາດລາວຄົນລາວ ກໍເປັນຄົນທີ່ມີກຽດສັກສີເໝືອນຄົນຊາດອື່ນໆ ແລະ ຢາກມີອິດສະຫຼະພາບ, ເປັນເຈົ້າຊະຕາກຳຂອງຕົນເອງ ແລະ ຢາກມີການພັດທະນາຕົນ ເພື່ອຄວາມຢູ່ດີກິນດີ ແລະ ຄວາມຈະເລີນວັດທະນາ ຍ້ອນແນວນັ້ນ ພວກເຮົາຈິ່ງຖືເອົາວັນປະກາດເອກະລາດ 12 ຕຸລາ 1945 ເປັນວັນປະຫວັດສາດທີ່ສຳຄັນຂອງຊາດ, ເປັນວັນແຫ່ງຄວາມເອກອ້າງທະນົງໃຈຕໍ່ຄວາມອາດຫານຊານໄຊໃນການຕໍ່ສູ້ ບົນຈິດໃຈຍອມຕາຍດີກວ່າເປັນຂ້ອຍຂ້າ; ຕາຍເພື່ອເອກະລາດດີກວ່າຢູ່ພາຍໃຕ້ແອກປົກຄອງຂອງຕ່າງຊາດ; ຈາກນັ້ນມາ ນ້ຳໃຈວັນທີ 12 ຕຸລາ ຈິ່ງກາຍເປັນມູນເຊື້ອແຫ່ງການຕໍ່ສູ້ມີໄຊຂອງຄົນລາວຜູ້ຮັກຊາດພາຍໃຕ້ການນຳພາຂອງພັກ, ສາມາດປົດປ່ອຍຊາດໄດ້ຢ່າງສົມບູນ ແລະ ໄດ້ສະຖາປະນາ ສາ ທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.

news to day and hot news