ວັນເສົາ, ວັນທີ 07 ທັນວາ 2024
ກອງປະຊຸມລະດົມພົນທະຫານພັນທະປ້ອງກັນຊາດປະຈຳປີ 2024
ເວລາອອກຂ່າວ: 2024-11-06 10:32:20 | ຜູ້ຂຽນ : admin2 | ຈຳນວນຄົນເຂົ້າຊົມ: 1748 | ຄວາມນິຍົມ: 
ກອງປະຊຸມລະດົມພົນທະຫານພັນທະປ້ອງກັນຊາດປະຈຳປີ 2024. ໄດ້ຈັດຂຶ້ນໃນທ້າຍເດືອນ ຕຸລາ ທີິ່ຜ່ານມາ, ໂດຍການເປັນປະທານຂອງ ສະຫາຍ ພົນຕີ ສາຍໃຈ ກົມມະສິດ ຮອງເລຂາພັກແຂວງ, ຮອງເຈົ້າແຂວງ ແຂວງບໍ່ແກ້ວ, ມີ ສະຫາຍ ພົນຈັດຕະວາ ບຸນມີ ພາມີໄຊ ຄະນະປະຈຳພັກແຂວງ, ຫົວໜ້າການເມືອງກອງບັນຊາການທະຫານແຂວງບໍ່ແກ້ວ, ມີການນຳຂອງແຂວງ,ເມືອງ, ປກສ ແຂວງ, ກອງພົນທີ 3, ຄະນະພັກ-ຄະນະບັນຊາ 6 ຫ້ອງ ຕະຫຼອດຮອດນາຍ ແລະ ພົນທະຫານເຂົ້າຮ່ວມ.
ສະຫາຍ ພັນເອກ ບຸນຈັນ ສີທະບຸນ ຫົວໜ້າຫ້ອງເສນາທິການທະຫານແຂວງບໍ່ແກ້ວ, ໄດ້ໃຫ້ຮູ້ວ່າ: ໂດຍອີງຕາມກົດໝາຍພັນທະປ້ອງກັນຊາດ, ອີງຕາມຄຳສັ່ງຂອງກົມໃຫຍ່ເສນາທິການກອງທັບ ວ່າດ້ວຍການລະດົມພົນທະຫານພັນທະປ້ອງກັນຊາດ ປະຈຳປີ 2024, ດັ່ງນັ້ນ, ຄະນະກຳມະການ ປກຊ-ປກສ ແຂວງຈຶ່ງໄດ້ອອກຄໍາສັ່ງໃຫ້ກອງບັນຊາການທະຫານແຂວງບໍ່ແກ້ວ ເປີດການລະດົມພົນທະຫານພັນທະປ້ອງກັນຊາດຈຳນວນ 90 ຄົນ ປະຈໍາປີ 2024, ໂດຍແມ່ນໃຫ້ຈັດຕັ້ງເປີດຮັບສະໝັກຢູ່ກອງບັນຊາການທະຫານເມືອງ 5 ຕົວເມືອງ. ທັງນີ້, ກໍເພື່ອແຈ້ງໃຫ້ບັນດາກົມກອງແລະອຳນາດການປົກຄອງບ້ານແນະນຳ ແລະ ລະດົມຊາວໜຸ່ມ-ໄວໜຸ່ມທີ່ເປັນພົນລະເມືອງດີຂອງຊາດເພດຊາຍນັບແຕ່ອາຍຸ 18-25 ປີ, ມີສຸຂະພາບແຂງແຮງສົມບູນ, ສັນຊາດລາວໂດຍກຳເນີດ, ບໍ່ສັກລາຍ, ບໍ່ມີສານເສບຕິດ, ບໍ່ມີພະຍາດຕິດແປດ, ບໍ່ເຄີຍຕ້ອງໂທດ, ຮຽນຈົບມັດທະຍົມຕອນຕົ້ນຂຶ້ນໄປ, ລວງສູງ155 ຊັງຕີແມັດຂຶ້ນໄປ, ນ້ຳໝັກສົມຄູ່ກັບ2 ຕົວເລກທ້າຍຂອງລວງສູງ. ອຳນາດການປົກຄອງແຕ່ລະບ້ານພາຍຫຼັງສຳເລັດຂຶ້ນທະບຽນບັນຊີແລ້ວແມ່ນໃຫ້ສັງລວມລາຍຊື່ສົ່ງໃຫ້ກອງບັນຊາການທະຫານເມືອງບໍ່ໃຫ້ກາຍວັນທີ 25/10/2024. ກອງບັນຊາການທະຫານເມືອງສັງລວມລາຍຊື່ເປົ້າໝາຍທັງໝົດທົ່ວເມືອງສົ່ງໃຫ້ພະແນກກຳລັງພົນ ຫ້ອງເສນາທິການ ກອງບັນຊາການທະຫານແຂວງບໍ່ແກ້ວ ບໍ່ໃຫ້ກາຍວັນທີ 25/11/2024 ນີ້.
ໂອກາດດັ່ງກ່າວ, ສະຫາຍ ພົນຕີ ສາຍໃຈ ກົມມະສິດ ໄດ້ເນັ້ນໃຫ້ຄະນະພັກ-ຄະນະບັນຊາກອງບັນຊາການທະຫານແຂວງບໍ່ແກ້ວ, ຕ້ອງພ້ອມກັນເອົາໃຈໃສ່ປັບປຸງແບບແຜນວິທີເຮັດວຽກຂອງກຳລັງປະກອບອາວຸດໃຫ້ສອດຄ່ອງ, ເປັນເຈົ້າການເຮັດວຽກງານສຶກສາອົບຮົມການເມືອງ-ນໍາພາແນວຄິດໃຫ້ພະນັກງານ-ນັກຮົບມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຖືເອົາຄຸນນະພາບທາງດ້ານການເມືອງ-ແນວຄິດເປັນກົກ, ຖືເອົາຄວາມສາມາດດ້ານວິຊາສະເພາະຫົວຄິດປະດິດສ້າງ, ສືບຕໍ່ປັບປຸງກໍ່ສ້າງກຳລັງທຸກເຫຼົ່າຮົບໃຫ້ມີຄວາມເຂັ້ມແຂງ ແລະ ໜັກແໜ້ນ, ມີຄວາມຈົງຮັກພັກດີຕໍ່ພັກ-ລັດກໍຄືປະຊາຊົນລາວບັນດາເຜົ່າສຸມໃສ່ສ້າງພະລາທິການກັບທີ່ ເພື່ອຮັບປະກັນໃນການເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ. ປະຕິບັດແນວທາງປ່ຽນແປງໃໝ່ຂອງພັກ, ເຊີດຊູສະຕິລະວັງຕົວ ປົກປັກຮັກສາລະບອບໃໝ່ປະຊາທິປະໄຕປະຊາຊົນໄວ້ໃຫ້ໝັ້ນຄົງ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຊາດ, ຂອງກອງທັບ, ຕັ້ງໜ້າປັບປຸງກຳລັງໃນທຸກດ້ານໃຫ້ໜັກແໜ້ນ, ເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງບັນຊາ, ປັບປຸງກຳລັງປະເພດຕ່າງໆ ແລະ ການຈັດຕັ້ງບັນຊາເປັນສິ່ງສຳຄັນ ມີແບບແຜນໃນການອົບຮົມ-ຫັດແອບທາງດ້ານສິລະປະຍຸດ-ຍຸດທະວິທີ, ລະດັບວິຊາສະເພາະໃຫ້ສູງຂຶ້ນກວ່າເກົ່າ.
ຂ່າວໂດຍ: ນາງ ນີ່ ທຳມະວົງ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
