ວັນອັງຄານ, ວັນທີ 10 ທັນວາ 2024
ທະຫານແຂວງບໍລິຄຳໄຊ ສະຫຼຸບການເຂົ້າຮ່ວມງານແຂ່ງຂັນ ກິລາເຮືອຊ່ວງ ປະຈຳປີ 2024
ເວລາອອກຂ່າວ: 2024-11-07 10:31:19 | ຜູ້ຂຽນ : admin2 | ຈຳນວນຄົນເຂົ້າຊົມ: 1466 | ຄວາມນິຍົມ: 
ກອງບັນຊາການທະຫານແຂວງບໍລິຄຳໄຊ ໄດ້ສະຫຼຸບການເຝິກຊ້ອມ ແລະ ເຂົ້າຮ່ວມງານແຂ່ງຂັນກິລາເຮືອຊ່ວງ ປະຈຳປີ 2024. ໃນວັນທີ 6 ພະຈິກ 2024 ນີ້. ໂດຍການເປັນປະທານຂອງ ສະຫາຍ ພົນຈັດຕະວາ ຈວງຈັນ ລາດຊະວົງ ຫົວໜ້າການເມືອງ ກອງບັນຊາການທະຫານແຂວງບໍລິຄຳໄຊ, ມີຄະນະຫ້ອງ, ພະແນກການ, ຄະນະຮັບຜິດຊອບ, ຄູເຝິກ ແລະ ນັກກິລາເຂົ້າຮ່ວມ.
ສະຫາຍ ພັນໂທ ສົມລິດ ບານທະວົງ ຮອງຫົວໜ້າຫ້ອງການບໍລິຫານ ກອງບັນຊາການທະຫານແຂວງ ໄດ້ກ່າວວ່າ: ຄະນະຮັບຜິດຊອບ, ຄູເຝິກ ແລະ ນັກກິລາ ໄດ້ເລີ່ມເຂົ້າສູນເຝິກຊ້ອມຕັ້ງແຕ່ວັນທີ 15 ພຶດສະພາ 2024 ເປັນຕົ້ນມາ ແລະ ໄດ້ເປັນເຈົ້າການໃນການຈັດຕັ້ງປະຕິບັດຂ້ໍກຳນົດກົດລະບຽບການເຝິກຊ້ອມຢ່າງເຂັ້ມງວດ, ເຮັດໃຫ້ການເຝິກຊ້ອມໄດ້ຮັບຜົນສຳເລັດເປັນກ້າວໆມາ, ນັກກິລາມີຄວາມຫ້າວຫັນ, ມີກຳລັງແຮງກາຍ-ແຮງໃຈເຂົ້າຮ່ວມງານແຂ່ງຂັນທັງນ້ອຍ ແລະ ໃຫຍ່ໃນແຕ່ລະປະເພດໄດ້ທັງໝົດ 31 ຄັ້ງ, ໃນນີ້ຕົກຮອບ 4 ຄັ້ງ, ນອກນັ້ນ, ສາມາດຍາດໄດ້ອັນດັບທີ 1 ທັງພາຍໃນປະເທດ ແລະ ຕ່າງປະເທດໄດ້ 15 ຄັ້ງ, ໃນນີ້ຢູ່ປະເທດໄທໄດ້ 8 ຄັ້ງ, ໄດ້ອັນດັບທີ 2 ທັງພາຍໃນປະເທດ ແລະ ຕ່າງປະເທດ 8 ຄັ້ງ, ໃນນີ້ຢູ່ປະເທດໄທ 3 ຄັ້ງ, ໄດ້ອັນດັບທີ 3 ທັງພາຍໃນປະເທດ ແລະ ຕ່າງປະເທດ 3 ຄັ້ງ, ໃນນີ້ຢູ່ປະເທດໄທ 1 ຄັ້ງ ແລະ ໄດ້ອັນດັບທີ 4 ຢູ່ລາວ 1 ຄັ້ງ. ຈາກນັ້ນ, ສະຫາຍ ພັນໂທ ບຸນມາ ວົງສັກດາ ຫົວໜ້າພະແນກນະໂຍບາຍ ຫ້ອງການເມືອງ ກອງບັນຊາການທະຫານແຂວງ ໄດ້ຜ່ານຂ້ໍຕົກລົງ ຂອງກອງບັນຊາການທະຫານແຂວງບໍລິຄຳໄຊ ວ່າດ້ວຍການຍ້ອງຍໍສັນລະເສີນຜູ້ທີ່ມີຜົນງານດີເດັ່ນ ໃນການເຝິກຊ້ອມ ແລະ ເຂົ້າຮ່ວມງານແຂ່ງຂັນ ກິລາເຮືອຊ່ວງປະຈຳປີ 2024 ໃຫ້ຄະນະຮັບຜິດຊອບ, ຄູເຝິກ ແລະ ນັກກິລາ ຈຳນວນ 73 ສະຫາຍ. ພ້ອມທັງຈັດພິທີມອບ-ຮັບຢ່າງສົມກຽດ.
ຕອນທ້າຍ, ສະຫາຍ ພົນຈັດຕະວາ ຈວງຈັນ ລາດຊະວົງ ກໍ່ໄດ້ຍ້ອງຍໍຊົມເຊີຍຄະນະຮັບຜິດຊອບ, ຄູເຝິກ ແລະ ນັກກິລາ ທີ່ໄດ້ພ້ອມກັນຜ່ານຜ່າທຸກຄວາມຍຸ້ງຍາກ, ທຸ່ມເທກຳລັງແຮງກາຍ-ແຮງໃຈເຂົ້າໃນການເຝິກຊ້ອມ ແລະ ເຂົ້າຮ່ວມງານແຂ່ງຂັນໃນແຕ່ລະສະໜາມ ສາມາດຍາດໄດ້ຜົນງານ ແລະ ໄຊຊະນະມາໃຫ້ກອງບັນຊາການຂອງພວກເຮົາ, ພ້ອມຮຽກຮ້ອງໃຫ້ຄະນະຮັບຜິດຊອບ ແລະ ຄູເຝິກ ແລະ ນັກກິລາ ຕ້ອງເອົາໃຈໃສ່ປະຕິບັດໜ້າທີ່ວຽກງານຂອງຕົນໃຫ້ດີ, ເປັນແບບຢ່າງທີ່ດີໃນການປະຕິບັດຂ້ໍກຳນົດກົດລະບຽບຕ່າງໆໃຫ້ເຂັ້ມງວດ, ຕັ້ງໜ້າເຝິກຝົນຫຼໍ່ຫຼອມຕົນເອງໃຫ້ມີຄວາມພ້ອມຢູ່ສະເໝີທາງດ້ານກຳລັງແຮງກາຍ ແລະ ແຮງໃຈ ເພື່ອກຽມພ້ອມເຂົ້າຮ່ວມເຝິກຊ້ອມ ແລະ ແຂ່ງຂັນກິລາເຮືອຊ່ວງ ປະຈຳປີ 2025 ເພື່ອແນໃສ່ຮັກສາມູນເຊື້ອອັນດີໄວ້ ໃຫ້ສືບທອດຕະຫຼອດໄປ.
ຂ່າວ-ພາບ ສີທອງ ຈັນທະວົງ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
